1 בך־יהוה חסיתי אל־אבושה לעולם׃

2 בצדקתך תצילני ותפלטני הטה־אלי אזנך והושיעני׃

3 היה לי ׀ לצור מעון לבוא תמיד צוית להושיעני כי־סלעי ומצודתי אתה׃

4 א‍להי פלטני מיד רשע מכף מעול וחומץ ׃

5 כי־אתה תקותי אדני יהוה מבטחי מנעורי׃

6 עליך ׀ נסמכתי מבטן ממעי אמי אתה גוזי בך תהלתי תמיד׃

7 כמופת הייתי לרבים ואתה מחסי־עז׃

8 ימלא פי תהלתך כל־היום תפארתך׃

9 אל־תשליכני לעת זקנה ככלות כחי אל־תעזבני׃

10 כי־אמרו אויבי לי ושמרי נפשי נועצו יחדו׃

11 לאמר אלהים עזבו רדפו ותפשוהו כי־אין מציל׃

12 אלהים אל־תרחק ממני אלהי לעזרתי [חישה כ] (חושה׃ ק)

13 יבשו יכלו שטני נפשי יעטו חרפה וכלמה מבקשי רעתי׃

14 ואני תמיד איחל והוספתי על־כל־תהלתך׃

15 פי ׀ יספר צדקתך כל־היום תשועתך כי לא ידעתי ספרות׃

16 אבוא בגברות אדני יהוה אזכיר צדקתך לבדך׃

17 א‍להים למדתני מנעורי ועד־הנה אגיד נפלאותיך׃

18 וגם עד־זקנה ׀ ושיבה אלהים אל־תעזבני עד־אגיד זרועך לדור לכל־יבוא גבורתך׃

19 וצדקתך אלהים עד־מרום אשר־עשית גדלות אלהים מי כמוך׃

20 אשר [הראיתנו כ] (הראיתני ׀ ק) צרות רבות ורעות תשוב [תחיינו כ] (תחייני ק) ומתהמות הארץ תשוב תעלני׃

21 תרב ׀ גדלתי ותסב תנחמני׃

22 גם־אני ׀ אודך בכלי־נבל אמתך אלהי אזמרה לך בכנור קדוש ישראל׃

23 תרננה פתי כי אזמרה־לך ונפשי אשר פדית׃

24 גם־לשוני כל־היום תהגה צדקתך כי־בשו כי־חפרו מבקשי רעתי׃