Psalm 63 WLC 1מזמור לדוד בהיותו במדבר יהודה׃ אלהים ׀ אלי אתה אשחרך צמאה לך ׀ נפשי כמה לך בשרי בארץ־ציה ועיף בלי־מים׃ 2כן בקדש חזיתיך לראות עזך וכבודך׃ 3כי־טוב חסדך מחיים שפתי ישבחונך׃ 4כן אברכך בחיי בשמך אשא כפי׃ 5כמו חלב ודשן תשבע נפשי ושפתי רננות יהלל־פי׃ 6אם־זכרתיך על־יצועי באשמרות אהגה־בך׃ 7כי־היית עזרתה לי ובצל כנפיך ארנן׃ 8דבקה נפשי אחריך בי תמכה ימינך׃ 9והמה לשואה יבקשו נפשי יבאו בתחתיות הארץ׃ 10יגירהו על־ידי־חרב מנת שעלים יהיו׃ 11והמלך ישמח באלהים יתהלל כל־הנשבע בו כי יסכר פי דוברי־שקר׃ Hebrew OT: WLC (Consonants Only) For comparative study, where possible, chapter and verse numbers on Biblos.com sites are mapped to the traditional convention used by the KJV, NASB, NIV and others. Bible Hub |
    |